आज आषाढ शुक्ल पूर्णिमाका अवसरमा देशभर श्रद्धा, सम्मान र भक्तिभावका साथ गुरुपूर्णिमा पर्व मनाइँदै छ। ज्ञान, शिक्षा, संस्कार र जीवनको सही मार्ग देखाउने गुरुजनप्रति कृतज्ञता व्यक्त गर्ने विशेष दिनका रूपमा यस पर्वलाई लिने गरिन्छ।
वैदिक परम्पराअनुसार महाभारतका रचयिता महर्षि वेदव्यासको जन्मजयन्तीलाई व्यास जयन्ती तथा गुरुपूर्णिमाका रूपमा मनाउने चलन रहिआएको छ। यस दिन शिष्यहरूले आफ्ना गुरुजनप्रति सम्मान प्रकट गर्दै आशीर्वाद ग्रहण गर्ने र कृतज्ञता व्यक्त गर्ने परम्परा रहेको छ।
देशभरका विद्यालय, शैक्षिक संस्था तथा विभिन्न संघ–संस्थाले गुरुको योगदानको स्मरण गर्दै विविध कार्यक्रम आयोजना गरेका छन्। गुरु–शिष्य सम्बन्धलाई अझ सुदृढ बनाउने यस पर्वले ज्ञान, अनुशासन, नैतिकता र संस्कारको महत्त्वलाई उजागर गर्ने विश्वास गरिन्छ।
संस्कृत भाषामा ‘गु’ को अर्थ अन्धकार र ‘रु’ को अर्थ प्रकाश मानिन्छ। अज्ञानरूपी अन्धकार हटाई ज्ञानको प्रकाश फैलाउने व्यक्तिलाई गुरु भनिने धार्मिक तथा तान्त्रिक ग्रन्थहरूमा उल्लेख गरिएको छ।
