सिंगापुरमा जारी एसियाली खेलकुद क्रिकेट छनोट प्रतियोगिताको उपाधिका लागि आज नेपाल र हङकङ आमनेसामने हुँदैछन्। दुवै टोली अपराजित रहँदै फाइनलसम्म पुगेकाले उपाधि भिडन्त निकै रोमाञ्चक हुने अपेक्षा गरिएको छ।
नेपाल र हङकङलाई एसियाली क्रिकेटका चिरप्रतिद्वन्द्वी टोलीका रूपमा हेरिन्छ। जारी प्रतियोगितामा दुवै टोली समूह विजेताका रूपमा सेमिफाइनलमा पुगेका थिए। सेमिफाइनलमा नेपालले ओमानलाई ८ विकेटले पराजित गर्दै फाइनलको यात्रा तय गरेको थियो। नेपालले ओमानले दिएको ९५ रनको लक्ष्य मात्र ९.२ ओभरमा पूरा गर्दै आफ्नो उत्कृष्ट लय प्रदर्शन गरेको थियो।
यता हङकङले सेमिफाइनलमा मलेसियामाथि ६ विकेटको जित निकाल्दै उपाधि नजिक पुगेको हो। प्रतियोगिताभर दुवै टोलीले सन्तुलित प्रदर्शन गरेका छन्, जसले फाइनललाई अझ प्रतिस्पर्धात्मक बनाएको छ।
जारी प्रतियोगितामा नेपाली टोली ब्याटिङ, बलिङ र फिल्डिङ तीनै विभागमा प्रभावशाली देखिएको छ। विशेषगरी सेमिफाइनलमा देखाएको आक्रामक खेल र आत्मविश्वासले नेपाल उपाधिको बलियो दाबेदारका रूपमा उभिएको छ।
नेपाल र हङकङबीचको हेड-टु-हेड तथ्यांक पनि निकै रोचक छ। दुवै टोलीबीच हालसम्म टी–२० अन्तर्राष्ट्रिय क्रिकेटमा १२ पटक भेट भएको छ। जसमा नेपालले ५ खेल जितेको छ भने हङकङले पनि ५ खेल आफ्नो पक्षमा पारेको छ। बाँकी २ खेल नतिजाविहीन रहेका थिए।
आजको फाइनल खेल नेपाली समयअनुसार दिउँसो १२:१५ बजे सुरु हुनेछ। यसअघि नै सेमिफाइनलमा पुगेका नेपाल, हङकङ, ओमान र मलेसिया आगामी २०औँ एसियाली खेलकुदका लागि छनोट भइसकेका छन्। अब सबैको ध्यान उपाधि जितेर छनोट अभियानलाई स्वर्णिम अन्त्य गर्ने लक्ष्यमा केन्द्रित छ।
अपराजित यात्राको अन्तिम परीक्षा, नेपाललाई हङकङको चुनौती
