आईसीसी टी–२० विश्वकप २०२६ अन्तर्गत नेपालले आफ्नो पहिलो खेल आइतबार विश्व क्रिकेटको शक्तिशाली टोली इंग्ल्यान्डविरुद्ध खेल्दै छ। शनिबारदेखि सुरु भएको प्रतियोगिताको पहिलो दिन नै एसोसियट टोलीहरूले टेस्ट राष्ट्रलाई कडा चुनौती दिएपछि अब सबैको नजर नेपाल–इंग्ल्यान्ड भेटतर्फ केन्द्रित भएको छ।
पहिलो दिन नेदरल्यान्ड्सले पाकिस्तानलाई दबाबमा पारेको थियो भने स्कटल्यान्डले वेस्ट इन्डिजसँग कडा प्रतिस्पर्धा गर्यो। त्यस्तै, अमेरिकाले भारतविरुद्ध अन्तिम क्षणसम्म संघर्ष गर्दै दर्शकको ध्यान तानेको थियो। यिनै परिणामहरूले एसोसियट टोलीहरू अब कमजोर छैनन् भन्ने सन्देश दिएको छ, र नेपाल पनि इंग्ल्यान्डजस्तो बलियो विपक्षीविरुद्ध केही विशेष गर्ने आत्मविश्वासका साथ मैदान उत्रँदैछ।
इंग्ल्यान्डलाई विश्व क्रिकेटको दिग्गज टोली मानिए पनि उसले हरेक विश्वकपमा कुनै न कुनै ‘सरप्राइज’ नतिजा भोग्दै आएको इतिहास छ। यही तथ्यलाई आधार बनाउँदै नेपाली पेस बलर सोमपाल कामीले विश्वकपअघि नै नेपालले इंग्ल्यान्डलाई ‘अपसेट’ गर्न सक्ने बताएका थिए।
“इंग्ल्यान्ड हरेक वर्ल्डकपमा अप्रत्याशित हार बेहोर्छ, यसपटक त्यो टोली नेपाल हुन सक्छ,” सोमपालको आत्मविश्वासपूर्ण भनाइले नेपाली टोलीको मनोबल झन् बढाएको छ।
आईसीसी टी–२०आई वरियतामा तेस्रो स्थानमा रहेको इंग्ल्यान्डविरुद्ध खेल्नु नेपालका लागि ठूलो चुनौती भए पनि अवसर पनि उत्तिकै ठूलो छ। तेस्रो पटक टी–२० विश्वकप खेल्न लागेको नेपाल यसअघिका दुई संस्करणमा समूह चरणमै रोकिएको थियो। तर यसपटक सुपर ८ मा पुग्ने स्पष्ट लक्ष्यसहित टोली मैदानमा उत्रँदैछ।
त्यसका लागि समूह चरणका चार खेलमध्ये कम्तीमा दुई खेल जित्नैपर्ने दबाब छ। यदि नेपालले इंग्ल्यान्डविरुद्धै जित हात पार्न सके आगामी खेलहरूमा टोलीको आत्मविश्वास र लय दुवै उच्च हुनेछ।
हेड टु हेड
नेपाल र इंग्ल्यान्डबीच टी–२० अन्तर्राष्ट्रिय क्रिकेटमा यो पहिलो भेट हो। यसअघि यी दुई टोलीबीच कुनै पनि अन्तर्राष्ट्रिय खेल भएको छैन।
इंग्ल्यान्ड विश्वकपअघि श्रीलंकाविरुद्धको टी–२०आई शृंखला जित्दै आएको छ। उता नेपालले मुम्बईमा भएको अभ्यास खेलमा एमसीए प्रेसिडेन्ट्सलाई पराजित गर्नुका साथै क्यानडा र यूएईविरुद्धका वार्म–अप खेल जित्दै राम्रो तयारी देखाएको छ।
नेपाल १२ वर्षपछि टी–२० विश्वकपमा पहिलो जितको खोजीमा हुनेछ भने इंग्ल्यान्ड आफ्नो विश्वकप दबदबा निरन्तरता दिने लक्ष्यसहित मैदानमा उत्रिनेछ। अब प्रश्न एउटै छ—के यो आइतबार विश्वकपमा अर्को ठूलो ‘अपसेट’ लेखिनेछ?
विश्वकपको रंगमञ्चमा नेपाल–इंग्ल्यान्ड द्वन्द्व: ‘अपसेट’को खोजीमा नेपाली टाइगर्स
