पूर्वकप्तान शरद भेषवाकरको नेतृत्वमा नेपालले हङकङ सिक्सेस क्रिकेट प्रतियोगितामा सहभागी हुने भएको छ। यस वर्षको संस्करण नोभेम्बर ७ देखि ९ तारिखसम्म हङकङको टिन क्वोङ रोड रिक्रिएसन ग्राउन्डमा आयोजना हुँदैछ।
प्रतियोगितामा नेपालसहित १२ राष्ट्र सहभागी हुनेछन्। नेपाली टोलीमा शरदसँगै सन्दीप जोरा, लोकेश बम, बसिर अहमद, आदिल अन्सारी, रशिद खान र रुपेश सिंह समावेश छन्।
गत वर्ष सन्दीप जोराको कप्तानीमा खेलेको नेपालले उत्कृष्ट प्रदर्शन गर्दै सेमिफाइनलसम्मको यात्रा तय गरेको थियो। तर, निर्णायक खेलमा यूएईसँग ५ विकेटले पराजित हुँदै फाइनलको यात्रा रोकिएको थियो।
यस वर्ष नेपाल समूह ‘ए’ मा परेकेको छ, जसमा दक्षिण अफ्रिका र अफगानिस्तान पनि रहेका छन्। हङकङ सिक्सेस छोटो ढाँचाको मनोरञ्जनात्मक क्रिकेट प्रतियोगिता हो, जहाँ हरेक टोलीमा ६ खेलाडी सहभागी हुन्छन् र खेल छोटो ओभरमा पूरा गरिन्छ।
यस पटक अनुभवी शरदको कप्तानीमा रहेको टोलीबाट नेपालले गत वर्षभन्दा उत्कृष्ट नतिजाको अपेक्षा गरिएको छ।
