एएफसी एसियन कप २०२७ छनोटको तेस्रो चरणअन्तर्गत नेपालले मंगलबार आफ्नो चौथो खेलमा भियतनामसँग प्रतिस्पर्धा गर्दैछ । खेल भियतनामको हो चि मिन्ह सिटीस्थित थोङ न्यात स्टेडियममा नेपाली समयअनुसार साँझ सवा ६ बजे सुरू हुनेछ ।
यो खेल नेपालका लागि होम म्याच भए पनि, दशरथ रंगशाला अन्तर्राष्ट्रिय मापदण्ड नपुगेकाले नेपालले विदेशी भूमिमा खेल्न लागेको हो ।
मंगलबारको खेल नेपाली फुटबलका लागि ऐतिहासिक बन्ने सम्भावना छ, किनभने अनुभवी मिडफिल्डर रोहित चन्द आफ्नो करिअरको १००औं अन्तर्राष्ट्रिय खेल खेल्दैछन् । यससँगै उनी कप्तान किरणकुमार लिम्बूपछि यस्तो माइलस्टोन पूरा गर्ने दोस्रो नेपाली खेलाडी बन्नेछन् ।
घरेलु टोली भियतनामका लागि भने यो खेल निकै महत्वपूर्ण मानिएको छ । यदि उनीहरूले नेपालमाथि जित निकाल्न सके भने, बाँकी रहेका ६ एसियन कप स्थानका लागि उनीहरू बलियो दाबेदार बन्नेछन् । हाल समूह ‘एफ’ मा भियतनाम ३ खेलबाट ६ अंकसहित दोस्रो स्थानमा रहेको छ भने शीर्ष स्थानमा मलेसिया ९ अंकका साथ अगाडि छ । नेपाल भने अंकविहीन रहँदै समूहको पुछारमा छ ।
समूह विजेताले मात्र सिधै साउदी अरबमा हुने एसियन कपमा स्थान पाउने भएकाले भियतनामले नेपालविरुद्ध जित्नैपर्ने दबाब महसुस गरिरहेको छ ।
नेपालले यसअघि भियतनामविरुद्धको खेलमा ३–१ को हार बेहोरेको थियो । त्यस खेलमा सानिश श्रेष्ठले पहिलो हाफमा बराबरी गोल गरे पनि दोस्रो हाफमा दुई गोल खेलेपछि नेपाल पराजित बनेको थियो । सो खेलमा लाकेन लिम्बूले रातो कार्ड पाएपछि नेपाल १० खेलाडीमा सीमित भएको थियो ।
हाल फिफा वरियतामा नेपाल १७६औं र भियतनाम ११४औं स्थानमा रहेका छन् । आगामी खेलमा नेपालले जित निकाल्दै आफ्नो छनोट अभियानमा नयाँ ऊर्जा भर्ने प्रयास गर्नेछ ।
